韓片《我班Friend好搞嘢》42歲女星咸素元，今年2月嫁拍拖1年、細佢18年嘅網紅男友陳華，兩人已登記結婚，預計夏天補辦婚禮。咸素元近日孖老公亮相綜藝節目《妻子的味道》，於噚晚播出一集中，更公開咸素媛懷孕10周嘅喜訊。

節目中，咸素元跟陳華一齊去睇婦產科，咸素元表示：「講起呢個實在感到唔好意思，因為都呢個年齡仲懷孕。」咸素元又透露二人於搬入愛巢前三星期、暫住父親屋企時成功造人。咸素元原本想保持神秘，唔講畀老公知，當佢叫老公唔好靠近佢嘅肚時，陳華即睜大雙眼。

另外，當見到BB嘅超聲波照片時，咸素元跟陳華都非常開心，雖然現時仲未知BB嘅性別，但就知預產期係12月28日左右。陳華表示：「會努力賺錢保護老婆同BB，不論男定女，健康最重要。」

更多韓流，喺晒《娛果》
http://fb.com/appledailyent