老霍兩三年前至狂嗌過「我挺董」，點知霍英東挺董，胡錦濤唔挺，阿董終於因自稱「腳痛」，企唔穩，挺唔住冧咗檔嘞！老霍即時改口，亦露骨挺曾，呢啲就叫做國家級領導人嘅「政治智慧」嘞！
反為民建聯馬力，態度曖昧夾消極，口稱「歡迎曾蔭權辭職」（呢句當然係真，係想佢扯咗唔好再返嚟！），不過就話佢個黨會唔會提名曾某競選，就「稍後決定」！
呢嗱嗱嗱，國家痛錫邊啲人多啲，就喺呢啲節骨上見真章嘞！霍英東挺曾，挺得快速，挺得毫無畏縮，點似得馬力，唔係咁挺，或者明挺實踩，挺得有氣冇力！唔怪得人哋霍英東愛國愛到身家億萬嘞！曾爵士參選，下一步，國家就要睇吓：呢隻係我隻馬，邊個提名，邊個膽敢唔提？若然提名，邊個快手，邊個特登拖慢，甚至彈弓手！上趟提名老董就咁快，今次唔提名煲呔，即是明侮辱緊胡錦濤，提名煲呔慢三拍，即是唔愛國，豈容民建聯重兩頭望？