一年一度打吡大賽日一如以往在3月中旬舉行，而今日（17日）68歲牛一的盃王大摩，經常吼準打吡大日子出擊贏馬補祝生日。

翻查紀錄，對上九季打吡賽日大摩均取得頭馬。周日（18日）他除在第八場打吡三路興兵外，「人民武士」及「大四喜」上周日（11日）跑完匆匆再出，亦有重視必要。

第二場「大四喜」早前曾連續四仗獲亞軍，上周日轉跑1400米，早段唔放而留守前領馬之後貼欄包廂位，結果陣上持續搶口而敗。今次「大四喜」用王牌報名匆匆再戰，似乎幕後亦心有不甘，繼續跑番1400米，若肯用回最擅長之放頭跑法，有機會勝回一仗向幕後交代。

另一匹匆出馬為角逐第六場二班1400米的「人民武士」，此駒上周日不敵廐侶「美麗鉅星」跑第二。睇番摩廐近兩季共有五駒上名後隔一周匆匆再戰，取得兩冠一亞兩季未失三甲，「人民武士」咁快又跑擺明要趁勇打鐵趁熱求功。