《孫悟空三打白骨精》今日喺屯門市廣場舉行做宣傳，郭富城、羅仲謙同埋導演鄭保瑞都有出席，同粉絲遊戲拍照留念。現場展出一個一比一孫悟空造型蠟像，但蠟像樣貌似乎同飾演孫悟空嘅城城不太相似，城城話：「係呀！我都唔係幾認得自己，不過冇所謂喇，最緊要十大家睇完套戲開心，睇完個蠟像就記得去睇《孫悟空》。」不過城城自言自己都未睇過套戲：「只係配音嗰時睇過，因為係用普通話拍，依家要配番廣東話部份。」

提到新片今個月20號喺北京首映時，城城話最想可以同埋媽咪一齊去北京睇首映明，咁仲有其他人呢？城城話：「只係帶一個人去就係最想同媽咪去，其他私人生活嘅嘢就唔講喇。」講到農曆新年有好多大片上映，對票房有冇心？佢話：「希望所有電影都百花齊放，因為片種都唔同，自己鍾意發哥、星仔又鍾意鞏俐，希望所有電影都有好票房，而自己就有好嘅口碑。」

城城表示稍後《孫悟空》會到內地多個地做宣傳，佢話雖然同時間佢自己又拍緊其他電影，但亦都會盡力配合宣傳。佢話：「呢套戲拍咗四個多月，大家都花咗好多心思落去，而呢套作品可以話係我入行以嚟最辛苦嘅一套，無論係體力抑或係身心都透支得好犀利，希望有好嘅回響。」會否拍續集？城城坦言仍未諗過，佢話：「依家諗番轉頭，都唔知自己嗰四個月點捱，塊面冇一忽好肉，但係都捱過咗。個特技化妝要成七個鐘頭，流汗都冇得抺，成面黐滿毛，又着住一件肌肉衫，佢仲笑言話拍一場文戲，好似跳完一隻舞咁。問城城會否包場請朋友睇時，佢反而希望朋友可以自己包場睇。

就嚟農曆新年，城城話會去上海拍電影《永不消逝的電波》，但都會返港宣傳《孫悟空三打白骨精》，今年除夕冇得好似過去十年咁同屋企人食飯團年。問城城農曆年返港時，會否帶女友返屋企食飯？城城即回應話：「我自己都返唔到嚟。」叫你女友代替你？城城話：「呢啲嘢冇得代嘅。」再問佢會否叫媽咪到上海？佢就叫大家集中喺佢嘅工作上，因為佢拍《孫悟空》真係好辛苦。

城城表示《孫悟空三打白骨精》嚟緊會喺全球24個城巿同步上映，希望大家支持。佢話農曆新年只有兩日留港，而情人節會喺上海工作中渡過。