應采兒（丁丁）今日喺BB用品宣傳活動上，自爆腹中塊肉係「慈姑椗」，起初丁丁仲好鬼馬叫記者估下BB性別，結果佢都係忍唔住講：「 係生雞仔，春仔嚟0架，佢（陳小春）好開心，不過我又想生女多啲，我會生多個。 」咁小春之後要再努力造人呀﹗

咁改咗名未？丁丁就話BB英文名由佢負責，中文名就會搵相士幫忙，丁丁話：「 英文名唔講住，本來我想改做『陳大春』或者『陳春』，但係佢話叫親個『春』字都會俾人打，仲話細個成日都俾人打，我都唔知點解，春字真係好奇怪！ 」不過咁，電影《春嬌與志明》嘅春嬌、有線新聞部高層趙應春、台灣男星丁春誠等等，都有個春字喎，都冇乜嘢丫。

丁丁又讚小春好乖，唔單止冇喺佢面前食煙，而且經常陪住佢左右。堅持剖腹生BB嘅丁丁，被問到會唔會餵人奶？佢笑笑口話：「 大唔一定會有 ，0依家啲奶粉好好，佢都有迫我餵，或者最多餵一個月，事關餵人奶要戒口， 我差唔多要飲酒啦，我忍咗好耐啦 ！」