嘩，教育大學校長張仁良曾經被「扑頭」，有冇受傷呀？答案係，冇嘅，因為呢件係發生喺佢那些年嘅求學時期，張校長自我形容當年「坐唔定」，雖然未至於係班中最頑皮學生，但都算係「多嘴仔」，上堂仲會同同學傾偈，自不然會被老師打手掌同罰企，仲試過被老師用書「扑頭」懲戒，係咪估佢唔到呢？

介紹返。張校長喺香港真光小學部同香港鄧鏡波書院讀書，即係由小學嘅「女校男生」升上男校，佢話成班男同學都鍾意做運動，成日一放學就會趕去修頓球場或者維多利亞公園，喺附近「咬個包」就落場踢波，有時仲會去灣仔東城戲院或香港大舞台（現址係合和中心）睇戲，一大班人都Like爆群體活動。

82年畢業於香港中文大學，主修數學，之後赴法國攻讀碩士同博士課程，85年獲法國巴黎第六大學嘅統計學博士學位，之後又喺英國斯特拉斯克萊德大學取得金融學博士學位，單睇履歷真係令人嘩嘩聲。但查實張校長求學時期都有艱苦期，中六臨近暑假尾時突然患上肺結核，立即送院治理，「嗰時天天打針同食藥，一盒藥丸有20幾粒，留醫葛量洪醫院近兩個月，趕唔切返學校開課，獲告知需休學一年」。

就算出咗院都要每日去診所打針同食藥，幾個月後則每星期兩次返診所打針，張校長話當時開始為休學嗰年思考前路，最終決定自修，幸好獲家人支持，佢好記得當時趁住唔使返學嘅「便利」，提早到自修室幫幾個同學「霸位」一齊溫書，最終透過自修生申請入讀中大獲取錄，「我好記得打最後一支針嗰日，剛好獲得中大取錄，呢啲情境至今仍然歷歷在目。」回想呢段時間係有啲「難捱」，但張校長話教曉咗佢唔好放棄嘅道理，同時感到家人同朋友支持嘅重要性。

其實有冇諗過從事教育界？張校長坦言冇，更加冇諗過會做教大校長，大學選修數學亦純因為有興趣，「我唔鍾意默書，又最怕背誦」，一直認為「天生我才必有用」，希望求學中嘅年輕人選科時應首重自己嘅興趣，正如佢當年都冇特別為要做乜職業而選科。

80年代去法國留學算係罕見，張校長卻獲得獎學金前往進修，佢話當初梗係人生路不熟，佢嘅法文又唔太好，病咗都唔知點同醫生講，最後要靠身體語言同醫生溝通。但喺法國三年時間成為佢最深刻體驗嘅時光，除咗學識照顧自己，仲畀機會佢睇下外面世界，寄語同學都要多往外闖吸收知識，唔好只留喺溫室成長。（當然好多人都知，張校長留法最大收穫之一當然係娶咗法籍靚老婆張雪婷啦！）

講到讀書生涯最印象深刻嘅老師，佢話係中大教通識課嘅陳方正教授，當時佢所屬嘅聯合書院，要求每名學者帶領幾名學生組成讀書會，之後寫閱讀報告。雖然教學繁重，但陳教授都肯花時間逐一見同學，指對方嘅認真、嚴謹同愛錫學生情境至今令佢難忘，可能因此令張校長而家都不時見學生，同佢哋打成一片噃。