最近到幾間唔同嘅寫字樓大廈訪客、開會，去過幾次廁所，本來係平常事，但每次都見到一啲「口號牌」釘在牆上，睇得多未免有啲反感。
最普遍一塊「口號牌」就係「用廁後請沖水」，大人大姐到寫字樓返工，唔通會用廁唔沖水，要別人提醒？諗唔通。
另一款口號牌寫住：保持廁所清潔，用廁後請沖水。成年人唔識得如何保持廁所乾淨嘅話，抵佢冇得撈啦，要「口號牌」提示，該煨。

不過最頂唔順就係喺大馬路九號一間豪裝辦公室，廁所裏面每一格都掛住口號牌：「請自重人格，保持廁所清潔，用廁後請沖水。行政部示」嘩，去廁所竟然與人格有關，擔子實在太沉重，呢間公司嘅行政部使唔使咁緊張，出言不遜，侮辱自己同事呀？莫非呢間公司嘅專家、專業人士去廁所搞到污糟邋遢，令行政部大為火滾！
如廁後沖廁、洗手，乃係基本生活習慣，幼稚園時期，老師已經如此教導，怎料在中環灣仔嘅甲級寫字樓，仍然見到叫人保持廁所清潔嘅告示牌，真令人心灰，唔通香港人嘅素質，竟如此低落？行街鄭去到大馬路二十號某層訪客，傾完之後去廁所，發覺冇廁紙，惟有尷尷尬尬咁走番入寫字樓問主人家攞廁紙，主人話業主淨係識收管理費，廁所就唔供應廁紙，租戶自理，但廁所內亦釘上「用廁後清沖廁」嘅告示，真諷刺，廁紙都唔供應，重膽敢訓示他人？