新民黨立法會議員葉劉淑儀當年為官時，氣燄好盛，曾批評議員涂謹申無禮貌、唔守規矩，所以唔答佢問題。風水輪流轉，貴為議員嘅葉太，今日喺立法會嘅財經事務委員會火拼一位首席助理秘書長，葉太氣上心頭，怒氣沖沖大力拍晒枱咁鬧個官：「你（官員）係咪當我哋傻嘅先？咁嘅態度，開會都冇用啦！」七情上面為乜？之唔係又係注定要畀議員鬧爆嚟「攞分」嘅領展囉。

會議主題講緊房地產投資信託基金守則，一聽個主題，就知道領展必定中槍。官員喺文件寫，過去12年，10隻喺本港上市嘅房託基金市值升值咗6倍，官員仲要講明唔會公開評論個別個案。

葉劉批評官員旨在袒護領展，話市值升咁多嘅房託基金其實只有一隻，就係領展，批評政府文件內容扭曲：「人人都知，得一間升（基金）咋嘛，你當我哋傻架？一開頭就落閘（唔畀議員詢問個別基金情況），你哋保護大企業大財團之心，昭然若揭，完全唔顧小市民嘅痛苦。」委員會主席張華峰想做和事佬，葉劉即刻拍枱鬧爆呢位首席助理秘書長鄭嘉慧，再厲聲質問佢：「你係咪當我哋傻嘅先？」由於提問時間已用晒，葉劉又趕住走，呢場戲就咁落幕。

葉劉同領展有過牙齒印，一年幾前，葉劉聲稱領展通過專欄作家李兆富對她出言恐嚇，葉劉當時引述時任該黨嘅政策總裁袁彌昌指，李兆富曾向他稱「叫葉劉唔好再搞喇喎，再搞會郁佢啲區議員㗎喇。」及後葉劉澄清她所講的「『郁』字係我感覺」、曾任領展公共政策研究顧問嘅李兆富其後委託律師入稟高院，告葉劉誹謗，要求索償。