《情慾通識》搵八方鄰居尊子畫封面，係一個朝天屁股，書入面有啲春宮畫同陽具雕塑，香港號稱亞洲國際都會，如果真係覺得呢啲內容敏感，都真係幾奇怪。
潘麗瓊又話另一本由精神科專科醫生苗延琼寫嘅新書《我為情狂──拆解愛情幻象釋放自我》都有相同遭遇，又係要入袋先賣得，有讀者去教協購買，職員話已收起，因為有啲內容唔適合放喺度賣咁話。
三聯承認部份分店確係有將以上兩本書包膠袋，但強調唔係涉及內容敏感，只係因為太多讀者打書釘揭書睇，店員為免新書未賣就被揭到殘，先至入袋加以保護，如果讀者想睇過先買，職員樂意「解封」。潘麗瓊對此不以為然，「賜官其他書都好暢銷，點解唔係通通入膠袋？」