前聯想（992）「鐵娘子」馬雪征、平安保險（2318）總經理張子欣，兩個喺中國名字響噹噹嘅打工皇帝走埋一齊，可以搞啲乜嘢呢？家陣最時髦嘅私募基金是也！
《金融時報》噚日話，家係德太投資（TPGCapital）亞洲地區董事總經理嘅「Mary姐」馬雪征好快就會起身，自己搞一隻以中國市場為target嘅併購基金，而佢嘅拍檔，就係將會喺3月18日正式離開平保嘅張子欣！
Mary姐同子欣哥點解會做拍檔，華華唔知內裏底蘊，之不過大家喺江湖上個朵都咁響，惺惺相惜又得、兩個一齊俾人睇中又得。
暫時嚟講，華華就覺得後者嘅機會大啲，因為華華八到，Mary姐同子欣哥呢個「征子基金」，幕後打本嘅，原來係「黑氣石」Blackstone！
華華收到風，先排張子欣同「黑氣石」嗰邊傾得好埋，仲以為佢離開平保之後，會過檔「黑氣石」，殊不知原來係「黑氣石」打本畀佢搞檔基金，都幾估佢唔到！