絕少拋頭露面上街遊行的香港大律師公會前主席湯家驊,因政府不聽民意,一意孤行為《基本法》23條立法,迫使這位遊行稀客也衝破心理枷鎖,與五十萬市民一起上街遊行,強烈要求政府,「為香港着想,為下一代着想,應該聽吓市民心聲。」他警告:「若政府仍視若無睹,蔑視呢股強大嘅民間力量,咁呢個政府唔再屬於香港人!」
湯家驊不諱言,大律師在思想及意識上都較保守,而且受到行規影響。他一直認為,大律師行事不應「高調」,所以自成為大律師後,他絕少參加遊行及派發傳單等宣傳活動。他說:「咁耐以嚟我只係參加過反對人大釋法嘅遊行,因為我始終都很難衝破呢個心理關口。我以為嗰次會係我絕無僅有嘅遊行。」
悲喜交集心情矛盾
他今次決心上街遊行卻是為勢所迫。「今次係政府迫成嘅,因為23條凸顯到政府對民間嘅訴求不瞅不睬,咁我哋惟有站出嚟,向政府表達我哋嘅訴求。為咗下一代着想,為咗爭取自由民主嘅香港,我覺得有必要企出嚟。」不過,湯家驊昨日懷着悲喜交集的矛盾心情參與遊行。他強調:「一方面我覺得香港人要淪落到親自上街為自己爭取權益,好可憐。但另一方面我見到原來反對23條唔止係我哋『小圈子』嘅意見,好多市民都同樣有咁嘅意見,令我好開心。」
在湯家驊前往維園期間,不少市民主動與他打招呼,更有素未謀面的市民向他言謝及稱讚他,強調:「香港𠵱家只係靠你哋(法律界),如果唔係,香港都唔知會變成點!」湯家驊認為,被迫上街,令他成為大眾認識人物,這與其行事低調及不喜曝光的性格背道而馳,但他只有無奈接受。