【增磅後再操弗】金子賢兩個半月減23磅 六嚿腹肌回歸
金子賢
日本過氣男星金子賢約兩個半月前於社交網站透露趁夏天挑戰節食操肌,噚日佢上載晒肌相,公開自己辛苦嘅成果,佢由178.2磅體重減到155.7磅,減咗足足23.5磅。
現年40歲嘅金子賢曾經活躍演藝界,佢曾夥安藤政信合演北野武執導電影《壞孩子的天空》,又拍過人氣劇《我Miss係大佬》,但都係半紅不黑,令人留下最深印象反而係多年前同廣末涼子傳過緋聞。
金子賢一度退出幕前轉攻格鬥界,幾年前佢宣佈回歸演藝界發展。近年金子賢練得一身fit爆身形,仲不時教人點樣操肌,今次佢刻意停止操練,增磅後再變番六嚿腹肌出嚟,過程同樣令人震驚。