當年今日
關於我們

馮仁昭四圍超:傅珮嘉呻窮男版Twins請食飯

蘋果日報 2002/01/09 00:00


馮仁昭大前晚見到一直以節儉見稱嘅新人傅珮嘉,同組合「EO2」嘅兩位男成員,重有新城DJCyrus周子駒(即英皇即將力捧嘅男版Twins成員),一齊喺跑馬地嘅「滿屋點心」食晚飯。

有信心再奪獎
傅珮嘉話佢𠵱家每日只得三十蚊使,不過好彩餐飯由Cyrus請客。
嚟緊重有兩個頒獎典禮,問傅珮嘉有冇信心再攞新人獎?傅珮嘉話:「係有啲壓力,但一定要對自己有信心。」

陳啟泰彈《各出其謀》唔夠緊湊
陳啟泰噚日去咗港台接受周國豐同陳淑蘭(左)訪問,講到林建明主持嘅遊戲節目《各出其謀》,上個星期平均收視有十二點(即約77萬人次收看),成績算唔錯,但陳啟泰就覺得節目入面嘅傾偈時間比較長,唔夠緊湊。不過陳啟泰就認為唔可以將《各出其謀》同《百萬富翁》做比較,因為兩個節目嘅形式完全唔同。

陳奕迅入《勁歌》男歌星五強
無綫《十大勁歌金曲頒獎禮》喺嚟緊嘅星期日舉行,𠵱家「最受歡迎男、女歌星獎」嘅五強形勢每日都唔同,噚日陳奕迅就踢走郭富城躋身五強,另外周杰倫、許志安、劉德華同謝霆鋒仍穩守五強之內。
女歌星方面,以新人姿態角逐的Twins亦趕走咗梁詠琪入五強,另外四強則係容祖兒、陳慧琳、楊千嬅同鄭秀文。
葉靜子任港台頒獎嘉賓
已故中共元老葉劍英的孫女葉靜子因早排同財爺梁錦松及鑽石王老五李澤楷傳緋聞而人氣急升,估唔到愈嚟愈多人打佢主意。
馮仁昭聽講,港台喺今個月十八號舉行嘅《十大中文金曲頒獎禮》,就有意搵葉靜子做頒獎嘉賓,至於葉靜子方面就已經應承咗。其他頒獎嘉賓重有劉燁同胡軍等。

洪金寶生日乖仔賀壽
洪金寶日前生日,當時佢正忙緊為西片《Highbinders》開工,工作人員特別為佢慶祝,而兩個仔洪天明同洪天照亦親到片場送蛋糕,重有燒鵝、煲仔飯同壽麵。成龍則送上價值三萬蚊嘅Temption限量版手表畀洪金寶做禮物。