被網友封為「仙氣女神」嘅鄺潔楹 （Judy）今日26歲生日，一班粉絲日前幫佢搞咗個生日會。Judy話擔心男女粉絲比例唔平衡，佢話﹕「前一晚擔心有人會唔嚟，又驚女粉絲比例，好在都有女fans，希望新一年可以吸納多啲女fans。」

為答謝一班粉絲支持，Judy前一晚仲親手焗製咗朱古力曲奇，佢話﹕「我之前喺社交平台直播煮嘢食，唔少fans留言話想試，所以今次我就整朱古力曲奇送畀佢哋，我事前已食咗幾塊，應該冇事嘅。」

聚會尾聲，甚少唱歌嘅Judy還開金口獻唱《一人有一個夢想》，佢話︰「第一次對住咁多人唱，畀自己70分啦，因為我發現有粒走音。」Judy話要多謝網民畀咗「仙氣」呢個稱號佢，為佢帶嚟好多工作機會。提到今年生日願望，Judy坦言工作愈多愈好，更攞自己身高自嘲︰「當然想再多啲嘢拍，想有多啲工作機會，如果拍廣告可以試下增高鞋呢類型，同埋想入劇組攞多啲拍劇經驗。」

精選娛聞，喺晒《娛果》 http://fb.com/appledailyent