映日灣是荃灣近年最後一個新盤。鍾先生打工多年，儲落100多萬元首期，荃灣人鍾情荃灣樓，2017年前開始抽柏傲灣、海之戀到全‧城匯，但都空手而回。等到去年8月，就在8.5荃灣斬人事件翌日，億京映日灣竟然開價，首批折實均價低同區二手市價一成，但鍾生睇到這口價已較之前抽不到的新盤貴逾兩成，「如果買唔到就會錯過最後機會」，而當時心想「對香港前景仍抱住希望」，於是入飛並抽中，以約560萬元買入一個一房單位。正值多事之秋，買樓前發生7.21，收樓前推出《國安法》，坦言「真係被殺個措手不及」，惟有望樓價不要跌太多。

鍾生是荃灣人，由細到大住荃灣，從事物流業，打工七、八年，在2017年已開始抽荃灣新樓，當年區內三個新盤排隊推出市場，依次為新世界（017）柏傲灣、長實（1113）海之戀、華懋全‧城匯，首批折實均價分別為15,183元、15,772元、14,449元。鍾生全部抽過，但抽不中，於是與妻子租樓住，等到2019年億京推出映日灣，首批折實均價17,740元，儘管當時比同區二手市價平約10%，但對比2年前抽過而抽不到的新樓已貴12%至23%，鍾生覺得：「見住樓價keep住上升，如果今次買唔到，我覺得就會錯過最後機會。如果買來自住嘅話，我覺得無問題。香港人個個都係咁㗎啦，無奈地接受而家嘅樓價……而家唔買，將來就未必買到。」

映日灣於去年8月推出市場，正是社運越演越烈的時候，被問當時有無擔心香港前景？為何仍敢於入市？鍾生表示：「我始終都係土生土長嘅香港人，我都係熱愛香港，對香港前景仍抱有希望，所以就買入呢個單位。當時賣樓係好墟冚，買家同經紀塞爆晒個展銷廳。」

對於當時有買家接受傳媒訪問表示「斬人事件是最近因為成個社會好多問題出現，人人獸性大發先會咁嘅情況。當香港恢復治安，人類獸性收埋一邊，呢啲事就唔會發生㗎喇！」鍾生表示認同，並謂：「呢句都講得幾啱。開頭我都有少少擔心，我相信香港人可以自我復原，可以面對所有問題。」他補充：「當時有一刻想移民，即使香港有物業，咪當係投資，將來想走，套現離開都無問題。」

不過最重要原因莫過於此乃荃灣近年最後一個新盤，他感嘆地說：「香港人覺得一屋難求，所以買到自己安樂窩真係好緊要。我喺荃灣抽新樓都抽咗幾年，由柏傲灣、海之戀到全‧城匯都抽唔中，咁啱映日灣抽得中，係上天畀我一個機會，所以就買咗呢個單位。呢個係荃灣區最後一個買新盤機會，最終成功咗。」最終他以560萬元買入項目一個一房單位，實用面積284方呎，支付兩成首期約112萬元。

當天買樓前遇7.21，今天收樓前遇到《國安法》，鍾生回應：「而家失驚無神又多個《國安法》，真係殺個措手不及。但始終要睇返條例立法後有咩影響，之後再作打算。（當日消息一出有二手買家臨場縮沙，你有無受影響？）都做晒所有嘢啦，都係硬食㗎啦！（驚跌嗎？）跌就可能跌少少，但唔會跌得太誇張，始終香港一屋難求。跌20萬元就唔太痛，跌1球就真係痛啲啦！」

睡房3笪「撲」批盪 雪櫃門不適合「各安」法

資深驗樓師詹濟南驗收鍾生的單位，甫入單位，站在大門燈掣位旁，即展現社運以來的幽默風格，「你覺得一掣好定兩掣好呀？一掣呢，一熄就全屋燈掣熄晒，有時喺客廳睇完電視想返入房，就要行到嚟大門閂掣，兩掣呢，係坐喺梳化就可以熄燈。喺呢度嚟講，兩掣係好過一掣嘅。」轉個身，他指：「雪櫃同組合櫃木門係同一班人裝嘅，唔會廚櫃佬還廚櫃佬，雪櫃佬還雪櫃佬，出現各有各安嘅情況。『各安』呢，就唔係咁好。」

詹Sir指出，睡房牆身出現3笪超過1平方呎的「撲」批盪，根據香港泥水商會標準，空鼓批盪不多於300毫米乘300毫米，可以不執修，但最長及最闊地方大過300毫米或以上，亦當作不及格，需要執修，「呢個係幾十年前我入行至今都沿用嘅標準。」而目前單位這3處空鼓批盪，有兩種執修方法，通常面積細會鏟底重鋪，另外可選擇打針，而此單位情況鏟底重鋪較適合。他強調，不建議業主提供任何意見交承建商如何處理，曾經有業主教師傅點做，結果出現問題，後果自負。

詹Sir總結，上述主要問題是睡房批盪空鼓，扣8分，另外連同瓷磚、門面等輕微刮花，總分88分。暫時驗收這樓盤多個單位，得分普遍85分或以上，個別單位有95分，項目整體交樓質素算不俗。

億京回應，上述單位的執修情況已完成，將會聯絡業主安排驗收單位。

記者：陳家雄

影片：
採訪：陳家雄、張嘉鎣
編撰、旁白：張嘉鎣
攝影：細釗
剪接、後期：劉果豐

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新

-----------------------------

屬於香港人的移民攻略
立即登入【全球樓行】
Dream House零距離