當年今日
關於我們

股海實戰錄:大戶似想先挾淡

蘋果日報 2002/01/04 00:00


有睇本欄嘅讀者應該知道近期趙飛雲係睇淡,理由係美國經濟能否喺今年第2季開始復甦仍是未知之數,杜指目前喺1萬點水平屬偏高,杜指短期10200有重大阻力,要突破並唔容易,而香港幾乎樣樣睇美國點行,所以美股唔掂,港股亦唔慌好。此外加上日圓弱勢、阿根廷金融風暴、911餘波未了,大戶要造淡,理由多籮籮,造好嘅值博率並唔大。

破11500試萬二
不過,炒股票除咗要分析基本因素摸到個大方向外,短炒要睇技術走勢,有時重要憑感覺行事。好似今年首個交易日,港股雖然未能以紅盤高收,但只跌46點,其實反映大戶按兵不動。噚日恒指藉美股造好回升72點,如果今日再以大成交飆升,相信好多人要追貨,有助大戶先抽高一轉挾淡倉,恒指有可能先升破11500,試闖萬二關至回落。
既然有咁嘅推測,而中海發展(1138)噚日破位而上,於是按原先前計劃喺1.30元先買入5萬股。雖然1.30元個位唔算靚,但考慮到中海發展稍後會有發A股動作跟尾,反覆炒上嘅機會較大,所以先買1注作短中線持有,止蝕位1.20元。