警鐘胸JessicaC.去年跟男友Sergio分手後，一直聲稱感情冇着落，但其實她已暗撻韓籍攝影師Dan。前晚，JC跟Dan孖住到銅鑼灣宜家傢俬試大床，二人情到濃時，不但瞓落床典來典去，Dan還趁JC典床之際摸她大髀，光天化日下公然在床上調情，認真教壞細路。

前晚7時15分，穿上黑背心露出螢光bra襯超短牛仔褲的JC，偕Dan到銅鑼灣的宜家傢俬購物，雖然現場人來人往，但二人仍不避嫌拖手仔，喜歡戴cap帽的Dan，雙臂還有大紋身。走入宜家後，JC與Dan一個箭步走去睇大床，其間二人在床上試瞓，JC興奮地在床上典來典去，意態撩人，由於JC所穿的「露袋」短褲太短，驟眼看以為冇着褲，就連一直待在其身旁的Dan也終於忍不住伸手撫摸JC的滑溜大髀。還記得去年一對穿校服的小情侶公然在宜家又攬又啜引起公眾譁然，想不到JC身為公眾人物亦照辦煮碗，公然與男友在公眾地方親熱，認真教壞細路。

典完一輪後，JC起身跟Dan狂呻大床唔啱心水，二人於是轉睇床笠、被單等用品，二人細心地研究質料及顏色圖案，但左揀右揀後始終未啱心水，最後逗留15分鐘便空手而回。其間Dan發現記者拍照，一度表現嬲怒地走上前欲開口大罵，惟記者表露身份及主動向他打招呼，Dan才平息怒火笑笑口回敬一句：「Hello！」

之後JC與Dan到樓上HMV買DVD，二人專攻外國電影，記者見JC揀了美國女星安娜花莉絲（AnnaFaris）主演的《翻兜有情郎》（What'sYourNumber？）等多齣電影DVD，估計JC準備與Dan在家中煲碟溫馨。

JC付款後與Dan雙雙步出HMV，記者上前拍照，Dan即害羞地彈開，反而JC落落大方任影唔嬲，並主動打招呼問好說：「Howareyou？」表現極度風騷。記者問其身旁男伴是否新男友時，JC笑笑口說：「Friend！」記者指看到二人手拖手，JC依然解釋二人關係只是朋友，然後偕Dan搭的士離開。