還記得本欄8月27日題為「三個原因短線變淡友」嘅文章嗎？恒指8月26日收報25074點，五個交易日後最低見24576點，當時滿心歡喜，諗住呢鋪肯定直插24000點，又可以認叻抽水。點知去到第六日，恒指一棍夾番上25000點樓上，之後仲創出六年新高。大跌原來又係一廂情願嘅諗法，睇錯市惟有認衰啦。之後嘅劇情，相信大家都好清楚--先穿25000點，星期一穿埋24000點，執筆時期指已經穿埋23800……
如果唐牛有玩期指，唔夠一個月已經俾人摑咗兩巴勁嘅，還未計中間嘅無限chok上chok落，幾可肯定，玩得期指九成九都係高手，老散如我夾硬衝入場，如同走入黑洞，渣都冇得剩。所以炒股咁多年，都唔敢玩期指，亦冇期指戶口，明明係輕量級拳手，走去搵泰臣隻揪，何必呢？