「借個女上位」——被指借個女上位嗰個譚順生，今日同個女——Celine妹妹「小巨肺」譚芷昀一齊出嚟喇！

出嚟做咩？當然係搵快錢啦。

現年9歲嘅Celine妹妹，為參加美國才藝節目《全美一叮》（America's Got Talent，簡稱AGT），要向學校請假。依家，比賽完喇，Celine妹妹繼續學業，今日傍晚近7點，仲同爸爸媽媽到尖沙嘴，出席一間cafe總店開幕。

上次Celine喺經理人蕭定一叔叔安排嘅慶祝會上就一身成熟花裙紫中帶紅仲著高跟鞋寸步難移，譚順生亦避席，今次係剪綵活動，爸爸當然要出席啦，Celine嘅打扮亦比上次「減齡」至少三十年。

Celine妹妹同爸爸一埋位，就喺傳媒鏡頭前整甜品啦。司儀鄭啟泰問Celine妹妹：「你覺得爹哋靚唔靚仔？」

求Celine妹妹心理陰影面積。

Celine妹妹就望住爸爸，諗咗一陣，然後指住爸爸話：「不如你講吖！」