將於後日成軍7年嘅韓國5人女團4MINUTE，大前日傳出拆夥，當中僅人氣最高嘅成員泫雅同所屬事務所CUBE娛樂續約，而其他4名成員關於合約問題依然同CUBE商討中。

4MINUTE同CUBE嘅合約於前日到期，不過今日有咗最終定案，CUBE發聲明表示其他4名成員都唔會續約並離開公司：「4名成員同公司傾咗好耐，不過最終決定唔續約。同4名成員合作咗咁耐最終要解約，覺得好可惜，不過我哋會尊重佢哋嘅意見並真心祝福佢哋、為佢哋應援。」即係已經確定4MINUTE正式解散，今後泫雅將會單飛，而據知另外4名成員目前有接觸其他事務所。

另外，另一元老女團WonderGirls經歷成員退團後，上年重新以4人之姿回歸樂壇。而近日4名成員接受雜誌訪問兼影咗輯新相，為配合夏天，4名成員着上潛水衣，大騷姣好身材。