話說噚日立法會開特別財委會，商務及經濟發展局局長邱騰華同梁家榮都到場，咁班議員一定問邱騰華插港台件事，民主派就肯定保港台，建制自然要插啦，但建制議員同邱騰華一樣，始終講唔到到肉嘅論點，呢個時候梁志祥話港台一年開支6億，要「衡工量值」，仲好似想幫何君堯抬轎助選，懶醒咁話港台節目嘅「收視率」低，話何君堯做嘅節目（八方估佢講嘅係facebook live）「收視率」好高啊，話隨時都有廿幾萬啊！
呢個時候榮總梁家榮諗住答佢，點知梁志祥繼續懶醒，叫榮總唔使講，不如講吓港台頭條新聞幾多收視率喎，好似港台輸硬畀何已完咁！點知榮總好心平氣和咁指正，話梁志祥講嘅「收視率」其實係「點擊率」，如果要同港台講「點擊率」，由2019年1月到2020年2月，《頭條新聞》點擊率就有2,000萬，而《鏗鏘集》仲勁，有成3,600萬！梁志祥就梗係冇聲出，同港台節目比點擊率？何已完真係連尾燈都見唔到！
李八方