咪以為阿公對記者寸嘴,平時對員工都唔會友善得去邊,其實只要你係有料,就唔怕佢寸嘴,一班數碼通員工其實都好唔捨得阿公。
聽講,除咗大圍送別宴,公司內部員工喺兩個星期前已經分開唔同部組同阿公個別farewell,仲搞到早排清減咗好多(阿公本人堅持冇減到磅)嘅阿公,身形反彈番唔少。
雖然阿公平日霸氣外露,但係聽講每個farewell,佢都有同員工深情對話,表現得好鬼感性,仲幾乎每次都講到眼濕濕。
噚日last day,阿公繼續有開會同工作,部份員工就偷偷哋同佢搞咗個小型派對,實行畀個驚喜佢。出席嘅當然唔少得佢兩位好幫手,分別係接佢手做總裁嘅鄒金根同財務總監陳啟龍。
阿公忍唔住眼濕濕,勉勵員工繼續努力,叫大家「好好做落去,畀心機」。阿公出名愛飲茶,一班員工就送咗套茶具畀佢,場面十分溫馨。
調番轉,阿公就冇派散水餅嘞,佢諗住遲啲再約同事出去聚舊。咁又係,離開數碼通,阿公應該得閒好多,大把時間約班舊部出去嘆茶。之不過,數碼通冇咗阿公,大夥兒會唔會好唔得閒呢?
李華華
mailto:
[email protected]