當年今日
關於我們

周末遊車河:黃泥涌→赤柱→石澳
扒艇數星星晒浪漫

蘋果日報 2002/11/09 00:00


拍拖節目會係睇戲、食飯、行街?行咗啲喎,何不趁住秋高氣爽揸架車仔四圍兜風玩吓!先去黃泥涌公園扒艇仔,再直落赤柱撐枱腳,最後入埋石澳睇星星,二人世界玩足全日,有動又有靜,總好過在人來人往嘅鬧市同人迫!

記者:黃婉冰攝影:林栢鈞
ImageBoy&Girl:Roy&Irene
車輛提供:合泰汽車(28828938)
福士NewBeetle1.8T 
至啱型男索女
福士NewBeetle1.8T可謂係型男索女嘅指定座駕;不但外形既Cute又吸引,車廂布局亦以圓渾為主,從而與車身產生互相呼應嘅效果。另外,由於尾廂載物容量甚高,配合掀背式設計,提存尾廂物件變得方便又容易。一台1.8公升直4Turbo引擎,亦能有強勁嘅動力輸出,加上出色懸掛系統,多套電子系統嘅輔助下,亦可予人有不俗嘅循迹力呢!

福士NewBeetle1.8T規格
引擎:1781cc直4DOHCTurbo
馬力:150ps/5800rpm
扭力:22.4kgm/2000rpm
尺碼:4081×1724×1498mm
軸距:2508mm
新車售價:$228,000(自動波版)
第1站
黃泥涌水塘扒艇餵鵝
由司徒拔道作起點,經由黃泥涌峽道向淺水灣方向駛到迴旋處位置,就到達黃泥涌水塘公園,去到必玩嘅就梗係扒艇同水上單車。租隻艇玩吓,既可靜靜地談吓心,又可以一嘗當年阿爸阿媽拍拖嘅情節,重可以同鴨仔近距離接觸!平日租艇每個鐘七十蚊,假日九十蚊。談心之餘重可以去售票處買包麵包餵魚同鵝,但啲鵝唔係成日露面,想餵要畀多啲耐性。唔識扒艇可改玩踩水上單車,兩個人可以租隻雙座位,平日八十蚊一個鐘,假日就一百蚊一個鐘,兩個人踩都幾吃力㗎!
提提你
揸車去黃泥涌公園玩,可以將架車泊入公園落少少嘅雅栢苑有蓋停車場,嗰度有時租車位供應,車位夠晒闊落,平日五蚊一個鐘,假日就十蚊一個鐘,畀四十蚊重可以泊全日!
黃泥涌水塘公園
地址:大潭水塘道
電話:28121252
開放時間:星期一至日及公眾假期上午9時至下午6時
第2站
直駛赤柱拍拖撐枱腳
黃泥涌公園內只得小食亭,附近只得住宅,玩完肚空空想醫肚最佳選擇就係直駛入赤柱開餐。離開黃泥涌公園沿住淺水灣道向住赤柱方向行,只要20多分鍾就可到達赤柱,架車可以泊入赤柱廣場停車場,每個鐘$13。
去到赤柱不愁無美食,兩支公最好就梗係搵間對海餐廳慢慢撐枱腳,美利樓西班牙餐廳ELCID可以話係情侶首選,事關餐廳對正海,夠晒浪漫,女朋友實鍾意,但始終露台座位有限,最好預先訂位。
墳場影沙龍
好多人入赤柱最多只會去到大街或者去沙灘燒烤,其實經過大街再向入駛重有好多地方玩同影相,赤柱軍人墳場係其一。嗰度雖然豎滿墓碑,但環境清靜又有大片綠草地,取景影相或者散步談心都好有Feel!
軍人墳場再行入啲向右轉就係聖士提反灣,沙灘旁邊有個小型碼頭,有好多風帆發燒友都鍾意喺呢度一顯身手,或者可以帶埋釣魚架生釣魚,隔籬就係露天車場,入表好方便。
「呢度唔係好多人入嚟,就算假日都唔會多人,無咩人同你爭,可以釣到鱲魚仔同泥鯭,但係今日釣咗一粒鍾都係得四條。」
提提你
去赤柱軍人墳場可以將架車先泊入聖士提反水上活動中心隔籬嘅露天表位。

ELCID
赤柱廣場美利樓1字樓102舖
電話:28990858
第3站
入石澳燒烤觀星
玩到差唔多日落西山,係時候離開赤柱向石澳進發,入石澳最好就係燒烤,皆因士多有晒燒烤用具同食物供應,沙灘左、右面都有燒烤場,右邊係免費,左邊要畀錢租,燒烤場夠乾淨企理又有埋洗手間,非常方便。就算唔燒烤都有多間特色餐廳畀你揀,醫完肚重可以落沙灘睇吓星星,結束一日浪漫之旅。
駕駛小貼士
司徒拔道到石澳主要以山路為主,沿路除彎位較多之外,由黃泥涌水塘公園到赤柱的這段路正進行修路工程,某幾段路會封閉變成單線雙程行車,尤其是經過彎位時要特別小心同慢車,因為彎位之後隨時會有車阻塞。另外在赤柱去石澳時,必定會途經大潭篤水塘,此路非常狹窄,有時又會有巴士經過,要加倍留意。
提提你
石澳海灘上面就有一個露天免費停車場,數量都算多,但每逢假日就好快爆棚。