今次搭去地中海的是郵輪「千禧號」，由意大利的威尼斯出發，12日的船程經過克羅地亞、法國、希臘等地，最後開到西班牙的巴塞隆拿。差不多2個星期的旅程，遊盡5個國家。全船一共有2,500名遊客，就好似個小社區咁。我都是第一次咁多人一齊搭郵輪，好興奮呀。無論去餐廳食飯、去酒吧飲嘢或者在甲板曬太陽，總會遇到唔同的人，因為旅客來自世界各地，絕對是個認識各地文化的好機會，趁機會跟唔同的人溝通交流。

成日聽藝人講，話一齊拍戲好易產生感情，我就話上船仲易，雖然短短兩個禮拜，我就見證唔少少男少女由朋友至男女朋友。無發展得咁快呀？就係發展得咁快。仲記唔記得有套戲叫《Titanic》？入面Jack同Rose都係得1個禮拜，所以話上船有艷遇或者遇到另一半的機會都唔小。今次我都有跟其他旅客發生感情，喂，先講清楚，其實感情都好多種，唔一定係男女之間嗰隻。在船上的12晚，每晚都會跟同一班人坐同一張枱食晚飯，晚晚見日日對，想無感情都好難。我就認識了來自蘇格蘭的夫妻、夏威夷的家庭和美國加州的家庭，一齊吃了12餐飯，就像一家人一樣。到最後一晚，大家都好唔捨得，臨走的時候我都眼濕濕。

頭先提到《Titanic》，船上的Olympic餐廳就同《Titanic》有密切的關係。原本Olympic餐廳是《Titanic》上的一家餐廳，「千禧號」就將整間Olympic重現，餐廳入面的擺設，以至室內的裝修，甚至是餐牌，都是依照當年而建造。我在這裏一邊聽着Mary彈奏豎琴的優美琴聲，一邊享受佳餚，對當時的《Titanic》幻想一番。正當我幻想得入神時，忽然一聲巨響，不是撞冰山吧，「各位，在劇院那邊今晚將會有大型歌舞表演，請各位留意。」原來巨響是提示旅客有show睇，嚇得我。

船上的劇院每晚都會有唔同的節目上演，其中4晚更會是歌劇和音樂劇的表演，保證晚上唔會悶親。我就最愛欣賞船上歌劇團百老匯式的歌劇，雖然船上場地有限，不過亦無阻他們的演出。

說到在船上不可不做的活動，就是在最後一晚的自助餐，就算食飽飽都要去睇睇。這個自助餐其實是一個farewell的活動，是各船員感謝旅客的歡送活動，他們用上足足兩日去雕冰雕和煮食物，極盡心思。

兩個星期好快就過去，旅程中到過差不多10個地方，當中我印象最深刻的是意大利的羅馬。除古迹外，名牌貨品特賣場才最興奮。好似IldiscountDell'altaModa，就專賣平價歐洲時裝皮具，數得出的歐洲名牌都有，雖然款式都是上一季的，不過平至三折，無所謂啦！

簽證：持特區護照或BNO均不用簽證。查詢：25220033（意大利駐港領事館）
機票：芬蘭航空經赫爾辛基往羅馬，價錢$5,910起。查詢：21171238（芬蘭航空）
郵輪：菁英郵輪「千禧號」15日12夜地中海古郵輪航空遊，行程包括來回威尼斯機票、接送及郵輪「千禧號」住宿膳食等；暢遊地中海國家如克羅地亞、意大利等多個國家，價錢$24,800起。
查詢：23161308（菁英郵輪香港代表）
網址：www.rccl-hkg.com
貨幣：1歐元約兌9.87港元

在船上，每晚晚飯，都有dresscode，無論formal或casual，男的都起碼要有恤衫西褲，女的都要着得斯文。唔好諗住扮型恤衫襯牛仔褲，一樣唔入得。

搭船同搭飛機一樣，同樣唔可以遲，半分鐘都無情講。最好finalcall前15至20分鐘返上船，就肯定唔會miss。我就試過塞車，爭啲上唔番隻船，非常驚險。

今日羅馬
氣溫20-26℃
濕度77％

明日
氣溫20-28℃
濕度65％

後日
氣溫21-29℃
濕度70％

3-5月：春天大地回春，百花齊放，愛花之人不要錯過。
6-8月：7月份有各大名牌店的大減價，天氣最熱，不過陽光充足。
9-11月：秋天的氣溫驟降，平均20℃，天氣開始涼。
12-2月：冬天是歐洲天氣最差的時間，寒冷非常，但各大名牌大減價喎。