韓國人氣男團Wanna One透過選秀節目《PRODUCE 101》男團版而出道，不過就限定活動一年半，原定於本年尾就解散，11名來自唔同事務所嘅成員會返到自己所屬嘅公司，繼續其演藝活動。雖然外界一直有傳Wanna One可能延長合約至明年1月，但組合所屬嘅Swing娛樂就表示「一切尚未落實」。

由於Wanna One嘅成員來自唔同事務所，所以要統一各方唔同嘅意見、遵照一個合約繼續活動，其實係相當困難。噚日就有韓媒引述Swing娛樂嘅內部人員透露，目前正討論三個方案，最大嘅可能性係組成小分隊，將願意延長合約嘅成員召集埋一齊，繼續以Wanna One嘅名義活動。

其次就係簽「次數限定」合約，即規定Wanna One成員每年要合體幾多次、出席幾多活動，平時就按照原屬事務所嘅行程安排。而最後一個方案就係按原定安排延長至明年1月，之後就直接將組合解散，為組合畫上完美句號，不過相信呢個方案實行嘅機率好低。

而喺相關嘅事務所中，亦有某位內部人士透露：「要喺一次會議中就順利召集所有公司、討論出結果真係好困難。」就算各公司都到場開會，仍然會小心翼翼咁睇大家嘅眼色，喺咁嘅氣氛下，好可能到合約結束嗰日都未達成共職。

精選韓流，喺晒《娛果》
http://fb.com/appledailyent