今年私有化例子特別多，大大話話講緊十幾單。點解個個突然爭住做？原因之一係股市表現雖然不太差，但炒風只集中喺某幾個板塊，其餘冇資金追捧嘅，只能喺水底浮沉。但呢啲乏人問津嘅公司，唔少價值連城，有資產有現金，令大股東進行私有化誘因幾何級數上升。

本地老牌物業及建築股瑞安建業（983），打開月線圖睇，股價喺11年低位橫行，但每股NAV高達7.52元，同最新價2.44元比較，市賬率只得0.32倍，殘得可憐。有私有化潛質，係咪一定會做呢？不妨從多角度解構。

角度一︰舊年以每股2.5元回購1億股，大股東羅康瑞及一致行動人士，持股由49.32%增至61.92%，變相大手掃貨，係咪玩貨源歸邊，為私有化鋪路呢？

角度二︰今年喺二手市場回購逾30次，同業華地國際（1700）提出私有化前，今年亦回購29次，兩者套路會否一模一樣？

角度三︰瑞安房地產（272）舊年初表示，羅康瑞正與銀行商討尋求融資，以進行私有化，但最終因市況不穩告吹，姊妹公司有前科，瑞安建業也可睇高一線？

講到尾，瑞安建業最新市值9億元，坐擁投資物業46.5億元，銀行存款及現金14.1億元，又有回購盤托價，刀仔鋸大樹佳品也。

唐牛fb專頁

http://www.fb.com/tongcow88