前公牛同湖人教練積遜（Phil Jackson）教波梗係叻，先後11次以主帥身份贏得NBA總冠軍，但呢位71歲「禪師」自從2014年3月上任紐約人籃球行政事務總裁一職後，球隊不利消息幾乎接踵而來，一時逼教練做「三角戰術」傀儡，一時又出專欄寸爆安東尼（Carmelo Anthony），搞到過去一季緣盡季後賽，家陣連球隊未來希望、拉脫維亞中鋒普辛基斯（Kristaps Porzingis）都喊走，仲有咩值得NYK球迷留戀？

據美國《The Vertical》報道，班主杜倫（James Dolan）周二晚上衡量「禪師」去留事宜，包括考慮其健康狀況等因素，雖然未有最終決定，但5年合約餘下兩年總值2,400萬美元嘅積遜最快有可能喺周三被炒，唔知到時紐約人球迷係咪會放煙花慶祝呢？