一時報稱「道士」，一時又自稱「居士」的袁銘權，身上無佩戴任何宗教物品，《蘋果》追蹤他半年，亦未見過他到過道堂、寺廟或佛堂，反而家中有個三層超大神枱，放在客廳正中央，比旁邊的三門雪櫃更巨型，當中放了多個神像，中間一層有一幅他信奉的準提佛母畫像。

自言懂得驅鬼，又能解降，更能跟閻羅王「講數」的袁銘權，平日除了上班外，就到附近的麵包店買包，在街頭食魚蛋，而放假多跟家人一起。

袁銘權稱父母早已離世，現與姊姊及妻子同住，育有一子一女，分別12歲及22歲。他跟家人感情要好，長女現時在澳洲讀書的學費由夫婦及袁的胞兄一起支付。記者多次上前邀約訪問，其姊都大力擋駕，百般維護。

家人信無辜

至於因非禮案被控，袁銘權直言妻子對此有微言，因在審訊過程公開真相時，其妻才得知丈夫為女性驅鬼會接觸對方下體，並指摘他：「幫咩人吖，結果係咁！」惟妻子和一對子女仍相信他無辜，「佢哋深信爸爸唔係人哋所講嘅嗰種人」。不過，當記者直問他有關警方搜出其手機藏有26段成人色情片，自言「修為夠」的袁銘權直認不諱：「我係正常人，七情六慾理所當然，大膽講句，有邊個男性冇接觸過嗰樣嘢（成人片）？」

追蹤期間，記者發現這名「道士」教仔亦有一套，有次他偕兒子到茶餐廳食下午茶，竟胡說八道地傳授「媾女經」。

二人言談間疑似提到兒子認識了異性，袁問兒子：「有冇諗過佢（係咪）玉女？」之後更直言：「我見過幾個朋友都係咁樣入教……條女鍾意……（哈哈哈），冇計！」他又笑着總結：「有幾個朋友信完我一陣之後，真係十世都唔信佛教徒，呃咗個老婆返嚟咪算囉！」之後又大發謬論：「問你一個問題，耶穌到底死喺乜嘢手上？」兒子表示對信奉宗教沒太大興趣，但袁即反駁：「唔係要你信，咁你都要識㗎嘛，唔係你點媾女呀大佬？」
■記者莊建鑫