美國減息半厘，美股前晚已經升勢難阻，有貨喺手嘅股民應該開晒香檳。不過，城中有個靚仔賓架噚日應該幾𤓓！邊個？
如果大家好似華華咁鍾意翻人舊賬，應該記得今個月初「銀行界梁朝偉」──滙豐執行董事王冬勝同傳媒講過，話美國減息機會一半一半，香港由於港元拆息略緊，加上曾經有兩次冇跟美國同步加息嘅紀錄，就算聯儲局減到半厘息，香港要跟嘅機會都唔大。

美國減唔減息，估唔中都唔緊要，最𤓓係講「聯儲局減到半厘息」呢吓中咗，但佢話香港唔使跟減息，點知噚日第一個仆出嚟減嘅就係佢。雖則只係減四分一厘，但即刻發埋新聞稿，速度之快可以話係冠絕全行。話晒滙豐喺香港銀行界嘅地位，你帶頭減，人哋梗跟𠺝！
所以有時預測嘅嘢真係唔好講得咁實牙實齒，加息呢家嘢，有好多外在因素，正如王冬勝自己對美國減唔減息都改咗幾次口，7月嗰陣話市場對減息反應過敏，預期今年美息維持不變嘅機會最大；到8月頭話美息應該唔會減；8月中又改口話有機會減；9月頭就話機會參半。
想好似賭王何鴻燊或者股神李兆基，估港股見兩萬五，就真係破兩萬五，唔係咁易㗎。呢鋪真係要「戒」！
[email protected]

要戒嘅點只王冬勝一個，估香港跟唔跟減息呢鋪，仲有唔少銀行金融界猛人跌眼鏡。

邊位：恒生銀行副董事長柯清輝
點講：即使美國今次減息，相信本港銀行亦不會跟隨

邊位：工銀亞洲董事兼副總經理黃遠輝
點講：以目前市況看，本港銀行短期內不會貿然跟美國減息，又或因資金成本上升而加息，故維持利率不變機會較大

邊位：中銀香港副總裁林炎南
點講：港美息差由100點子收窄至80點子，反映市場資金較緊，故本港未必會跟隨美國減息

邊位：美國運通銀行北亞區財資市場部主管陸庭龍
點講：過去美國有兩次加息，香港沒有跟隨，相信今次香港也可以不跟減

邊位：里昂香港研究部主管羅震傑
點講：目前拆息水平已屆歷史高位，因資金成本較高，料本港銀行不會立刻跟隨美國減息