【新增回應】

大陸宮鬥劇《延禧攻略》近日爆紅，帶挈幾位主角人氣大升，好似飾演女主角「魏瓔珞」嘅吳謹言、「富察皇后」秦嵐、「嫻妃」佘詩曼同飾演「傅恆」嘅許凱等等。唔少品牌都食住呢個「延禧」熱潮搵班主要演出席各品牌活動，好似「富察皇后」秦嵐咁，今個月中就會嚟香港出席品牌活動，傳聞佢酬金高達成百萬㖭。

《蘋果》收到消息，人氣爆燈嘅吳謹言，原來亦將於月底嚟香港做宣傳，聽聞佢會喺今個月24日嚟香港幫大台宣傳熱播中嘅《延禧攻略》，除咗吳謹言、傅恆同阿佘等都會一齊亮相香港宣傳活動。

人紅自然是非多嘅吳謹言，近日就被央視旗下《中國電影報道》公開鬧佢扮大牌，就最近約吳謹言做訪問一事喺微博力數佢三宗罪，鬧吳謹言嘅團隊「臨時更改採訪地點」、「不提出充裕時間接受訪問」同「要求記者支付場地費用」，雖然吳謹言同經理人方面事後再三道歉，但有消息指廣電總局口頭通知各大影視公司要「慎用」呢個演員，所以有傳原本屬意吳謹言嘅兩部電影最後決定換角。估計經過呢件事之後，吳謹言稍後嚟香港面對傳媒，都會份外小心講說話。

而無綫企業傳訊部回應傳媒查詢《延禧攻略》演員來港一事，指一直努力與片商磋商，希望可安排劇中演員九月下旬來港與廣大觀衆見面，有關細節安排有待落實。

精選娛聞，喺晒《娛果》
http://fb.com/appledailyent