逢有女人嘅地方都定必會有是非，日本唔少女團都一直傳出不和消息，雖然AKB48組成多年，成員之間表面好似相處融洽，不過為咗爭上位，難免會影響感情及產生心病。

好似近年被受力捧嘅AKB成員島崎遙香，早前拍戲已經新聞多多，日前被滾茶淥親腳嘅佢，噚日負傷現身公開場合，點知喺記者會上口不擇言，竟向在場記者表示以自己標準而言，隊友指原莉乃個樣完全唔合格。

身為AKB家族一姐嘅指原，對於被隊友在公開場合直指樣衰，噚日即嬲爆於Twitter連珠爆發留言：「由Paruru（島崎遙香暱稱）選，論到樣貌就不合格嗎...」指原言語間仲暗寸島崎遙香性格好有問題，當有網友問到如果指原選人要有乜嘢條件，指原即毫不客氣回答話最重要係「性格」。指原之後都句句有骨，又例出一班心目中嘅AKB家族主將，包括有柏木由紀、渡邊麻友、高橋南、松井珠理奈、山本彩、宮脇咲良，指原話揀佢哋唔係計人氣同埋樣貌，純粹係靠直覺喎！