有馬迷話幾欣賞我上期專欄，終於寫到「小雲雀」，等大家再認識我多啲啲，而咁啱我無失靈，就再多咗人傳閱，真有運。

我仲有個花名係「吱喳妹」，非常之形象化，你哋明啦！好似係舊時返暑期工嗰陣，老闆娘改嘅，全部同事都咁嗌。你哋即管恥笑，大家開心，我無所謂。

親友叫我係雲雲，咁當然，隨住年齡增長，表兄弟姊妹嘅塞豆窿就隔九條街，都要大聲嗌「雲雲姨」，認真想扮唔識。

總結，花名有N個，人咪又係關楚雲一個，學老媽話齋：「你呢條友咁乜乜乜乜，化咗灰都認得你啦！」哈！應該係積怨N年嘅深仇大恨。

馬方面，我都有隻特別認得嘅明日（16日）第七場「軒轅齊飛」。先講綵衣，係一盞比較黃嘅紅綠燈，行過跑過好搶眼。然後就到我哋之間嘅恩怨情仇啦！佢16年尾登場，嗰陣我開始認真刨馬。見佢睇落唔差，輸足大半季，算！總之我就一頸血。

「軒轅齊飛」上場臨場幾歡喜佢，1600米都照買咗披，似試馬咁拎第四。再睇佢操同試閘，狀態更勝上回，我大膽揀佢做Q及QP膽，希望到時唔使抹血。