陳法蓉（Monica）一向勇於挑戰難度，即使連健康也要接受大挑戰，之前她學潛水，迷上後經過一番努力，終於取得教練牌照，現在她又愛上瑜伽，三年前她已經開始練習，不過因為工作一直斷斷續續練習，而且她亦換過教練，不過紿終情歸現任教練Dickson。Monica日前說：「其實我自己都讀緊瑜伽教練證書，之前攞咗初級教練證書，係可以做助教，初時我學只係玩玩吓，後來發覺原來瑜伽對身體健康好有幫助。」

為了更上一層樓，Monica現在繼續報讀中級教練課程，她雀躍地說：「我聽教練講如果考得到呢個證書，係全球只有幾個人被正式認可，因為呢個證書係國際認可嘅，由YogaAlliance國際瑜伽聯盟發出證書，中級教練要練滿200小時，我仲差大約30小時。」
瑜伽的每一款動作，對身體不同器官或部位均有幫助，但絕對是難學難精，一身貼身背心運動裝打扮的Monica，正好向大家展示實力。日前在教練協助下先來鬆鬆筋，不過看見Monica鬆筋的樣子，未正式示範已香汗淋漓，原來練習最好不開大冷氣，這樣會令筋骨受影響變硬。

結果一個又一個的高難度動作，屈膝拗腰、撐背倒豎葱，招招攞命，只見Monica一頭汗，筆者看得一額汗，不過卻難不到她呢！Monica打趣說：「係咪好似十大酷刑咁呀，睇落好似好辛苦，其實我唔係好痛，我啲筋骨夠軟啩。」她認為在瑜伽中可以享受痛苦，在痛苦中學習放鬆自己，到學習勉強自己，不能放棄的態度，這樣才有進步，儼如人生哲學道理。
此外，Monica覺得現在有很多都巿病，如失眠、周身骨痛、頸痛、腳底痛也是令人頭痛的疾病，她也有過都巿病，但自從學瑜伽後，令精神鬆弛，而且拉鬆筋骨可舒筋活絡。她說：「瑜伽分好多種，可以鬆弛神經、減肥，每次做完都一身大汗，其實咁係好，因為汗水可以冲走污糟嘢，令毛孔亁淨啲，加速血液循環，年紀越大血液越流得慢，所以更加要好好保養身體。」
做運動是能夠養生活血，不過健康飲食也不容忽視，Monica自言是無肉不歡的食肉獸，餐餐必要有肉到肚，她說：「我嘅飲食習慣都幾得意，我唔食菜，不過飲菜湯。我唔食生果，不過飲鮮果汁，我諗我係比較另類口味，我最鍾意食啲膠質重嘅食物，因為對骨骼好，又幫助皮膚回復彈性，好似食豬手、花膠都有好重嘅骨膠原。」有很多人覺得保持健美一定要戒肉戒澱粉質，以她親身經驗其實不用如此待薄自己。

Monica續說：「我乜嘢都食，漢堡包、Pizza、煎雞翼、牛、豬、羊排都一樣照食，我知呢啲係較高熱量嘅食物，不過咁先對體能好，咁先有氣力，當然食咁多，一定要多做運動，我嘅運動量好大，好似去潛水、瑜伽都係好大力量嘅運動，消耗越大越可以燃燒多啲卡路里，同樣有助減肥，所以喺食方面唔能夠太清淡，否則冇力量應付。」所以不要看Monica大吃大喝，其實是因為她的運動量太大，經過燃燒脂肪她才得以保持苗條身段。

中國人覺得湯水十分重要，陳法蓉都認同在湯水中吸取營養十分緊要。除了靚湯，她亦鍾情滋潤的甜品。

紅棗生魚蘋果煲鮮奶湯
先煎香生魚，再放剝皮蘋果及去核紅棗，一齊煲三小時，校細火再加入鮮奶，用溫火攪勻15分鐘，熄火，白雪雪的湯便呈現眼前。蘋果有助消化，生魚對皮膚有益，而且有鈣質，能消除黑眼圈。

佛手瓜紅蘿蔔粟米豬骨湯
這煲湯要煲三小時，因為陳法蓉天生喉嚨不好，故要這類的湯水來潤喉，經常飲用有益而無害。

燕窩雪蛤膏湯
燕窩與雪蛤膏均是補品，本來可以加添當歸，可是當歸未必每個女性也合用，若是子宮不夠健康，患有水泡或小瘤，便不宜飲用當歸，因為當歸甚補身，進補便加速子宮瘤長大，這樣會影響及刺激體內荷爾蒙。

雪耳燉冰糖
雪耳有豐富的膠質，有助皮膚回復彈性，而且可凍或熱進食，最重要是一種溫和補品。

民以食為天，陳法蓉對飲食頗有研究，口味特別刁鑽，她的心水食肆推介分別是法國菜、泰國菜、打邊爐和快餐。

刁鑽牛面珠（FrenchTable法國私房菜）
位於尖沙嘴的FrenchTable法國私房菜，套餐價錢約300元，最令人食指大動的有牛面珠、鵝肝。

惹味花膠仔（小肥羊）
火鍋也是陳法蓉的極品至愛，她推介小肥羊的花膠仔、肥牛及羊肉，湯底辣與不辣也同樣喜歡。

無生蝦不歡（金寶泰國餐廳）
泰國菜也是陳法蓉的至愛，在九龍城的金寶泰國餐廳，其中的生蝦及醬爆蝦膏，令人食過翻尋味。

至愛脆雞翼（麥當勞）
最後是大眾化推介，就是麥當勞的脆香雞翼、至尊漢堡及士多啤梨新地，陳法蓉形容是好味到暈。