現時韓國最火熱嘅男團就非Wanna One莫屬，佢哋雖然正式出道只得個多月，但人氣可以話以「恐怖」來形容，事關佢哋現身嘅地方，必定會惹來粉絲追星，而下周二及三佢哋仲會嚟香港舉行首個粉絲見面會，到時必定引來大批港迷迎接。

而Wanna One噚晚就現身喺江南舉行嘅K-Pop演唱會，今日就再出席「2017 Korea Music Festival」音樂節，雖然現場仲有其他男團女團，但就以Wanna One嘅人氣最勁，當中成員裴珍映同黃旼泫就擔任司儀。而音樂節延遲一小時才開始，令現場粉絲勁鼓譟，指摘大會冇任何解釋，加上粉絲一度誤會Wanna One唔會出場，所以令粉絲更加憂心，其間又不斷迫向前，又與工作人員發生爭執，令場面十分混亂。粉絲都怒斥大會安排失當，更有粉絲要求退飛。

另外，Wanna One嘅李大輝同朴佑鎮，聯同林煐岷及金東賢今日就出席Brand New Music事務所老闆Rhymer嘅婚禮，四人仲喺婚禮上表演。