王宗堯、周家怡、吳孟達（達哥）同楊淇早前喺新蒲崗一間酒店接受訪問，幫主演嘅電影《導火新聞線》宣傳。達哥話差不多有兩年冇拍港產片，對上一套係彭浩翔導演嘅《香港仔》。達哥大派高帽話估唔到呢幾位演員可以演得咁穩：「內地演員同我拍戲，佢哋都好有戒心、好緊張。反而佢哋（宗堯、家怡同楊淇）完全冇呢種心態，熟讀劇本個人信心大好多。」

「張家輝唔敢望我」

達哥又大爆張家輝同張衞健嘅秘密，仲賣口乖讚宗堯：「有場戲喺街拍，有路人、有粗口，佢都拍得好穩，成個成熟嘅劉德華咁。印象特別深刻嘅係佢同我有眼神交流，唔容易做到，而且可以令到我有感覺，張家輝同張衞健都唔敢望我。」達哥話好多人唔敢同佢用眼神交戲，佢話：「真㗎家輝咁講呀，話『達哥你唔好畀呢啲眼神，我頂唔住呀』，佢唔敢要我啲眼神，佢哋會避開㗎。」
宗堯話可能成日冇份拍都去現場睇達哥做戲，宗堯話：「可能係咁熟絡咗，冇咁怯場。」楊淇同家怡就話同達哥冇乜嘢對手戲，但係都成日去片場偷師。
場地提供：香港九龍貝爾特酒店
撰文：馮仁昭