被網民形容為「M巾盤」的恒地（012）大角嘴利奧坊‧曉岸交樓質素，反映近期四叔新盤持續下滑，一個實用面積259方呎的一房單位，15項交樓工種，8項得分不足一半，更捧3個零蛋，總分49.9分，再錄低分。

今次驗收單位位於M巾盤的正中間位置，業主花415萬元買入，銀碼低，但單位實用面積僅259方呎，呎價講緊1.6萬元。單位雖少，但仍錯漏百出，污糟邋遢。簡單清垃圾、抹乾淨的門面功夫慳得就慳，廁所抽水箱、廚櫃底亂石一埋，打開廁所鏡櫃，甚至一塊2吋長碎玻璃都懶得執走，整潔零分。

垃圾可清，污跡可除，來去水也要扣到零分。廁所洗手盆去水喉隔氣漏水，櫃底可見新舊水迹交替，問題存在已久，詹sir扭實後再試水，沒料到仍然漏出水來，詹sir指出：「扭實咗都漏，隔氣杯應該係地盤被壓扁咗，個杯變咗型，好似鵝蛋咁，呢種情況要換，或者綑防水膠布，最好當然係換咗個杯。」

同系單支樓土瓜灣迎豐一個低層單位兩個月前經本報委託另一名驗樓專家賴達明檢驗所發現的洗衣機喉漏水問題，今次在詹sir驗收下不是來水喉出事，而是去水喉漏水，滴到一灘水迹。幸好是去水喉出事，而非來水喉，不會浸滿全屋也懵然不知。結果屬於4大扣分位之一的來去水亦零分。

另一個扣大分位是地板，結果全屋多處地板鬆動需要加固，例如睡房門邊、電話掣邊、睡房門對面等，是另一個捧蛋的工種。空心批盪也出現兩處，集中房間，剷底重髹少不免，免得日後睡夢中，批灰剝落擊中臉，令到批盪扣一半分數。

近年新盤經常出現的玻璃窗崩花問題，在今個單位都有出現，其中唯一一間睡房的梗窗甚至有氣泡，爆裂機會高，必須更換。而房間另一扇窗邊外框唧膠有孔，甚至窗框凹入，初步未見會造成滲水，但更換為妙。

詹sir總結，單位傢俱選用木飾面，交樓工種較往常加多1項至15項，當中7個工種獲9字頭以上，例如地台、門等，然而其餘8項工種均扣一半或以上分數，當中3項零分，包括來去水、地板及整潔，佔比較高的窗及批盪分別得1分及5分，導致總分低至50分。

對於利奧坊‧曉岸驗樓結果，恒地表示已收到業主提供的修葺單，並相約於日內到單位視察跟進和展開修繕工作。修繕完成後，將盡快安排業主驗收。

記者：陳家雄

攝影：周志堅

蘋果財經，關心你飯碗
http://fb.com/appledailyatm