曾於2012年嘅韓國MBC電視台選秀節目《偉大的誕生3》中奪冠嘅25歲男歌手韓東根今日被爆於上月底涉酒駕，將全面停工並進行反省。

根據韓媒今日報道，韓東根於上月底深夜喺首爾方背洞附近因酒駕被警方截查，血液中嘅酒精濃度為0.103%，達到吊銷駕駛執照嘅指標。

對於韓東根涉酒駕，其所屬嘅Pledis事務所今日發表道歉聲明，並指對韓東根酒駕一事致以真誠嘅道歉，同時指韓東根現時亦正深深為事件反省，及感到後悔。而韓東根今後嘅活動將全部停止，並會認真及誠實配合警方調查。

事務所方面亦指今後會對旗下藝人進行防止酒後駕駛嘅定期教育，保持對酒駕嘅警惕心，以防止酒駕事件再次發生。

事實上韓東根曾於節目上自爆於2010年時患癲癇症，時常突然暈倒，錄製音樂節目《蒙面歌王》時更試過暈倒喺廁所內，醒返就唔記得發生乜事，必須長期透過食藥治療，所以唔少網民得知今次酒駕事件後，都狠批佢「害己害人」。

更多韓流，喺晒《娛果》
http://fb.com/appledailyent