韓國男團EXO三名成員世勛、燦烈及Kai今日來港，出席於銅鑼灣舉行嘅品牌活動，吸引過千粉絲逼爆商場等見偶像。

約傍晚6點20分，喺品牌CEO等人致詞後，燦烈、世勛及Kai於主持人介紹下逐一亮相，三子亦有向高層嘅粉絲揮手，雖然主持人一度將世勛講錯為Kai，不過無損粉絲心情，同樣以尖叫聲歡迎，主持人就叫粉絲要小心，唔好向前迫。

燦烈、世勛及Kai之後以韓文逐一打招呼，燦烈更同普通話表示「好久不見」，提到今次來港宣傳，三子表示好開心可以再嚟，亦指好榮幸成為品牌嘅代言人。之後三位成員逐一提到近況，世勛及Kai分別投入拍攝網上電影及新劇，叫粉絲多多支持，三位成員亦表示如有機會，想拍香港電影及劇集。

被問到最鍾意香港嘅咩時，燦烈指鍾意夜市，世勛就話鍾意香港嘅美食，包括蟹同龍蝦，不過佢同Kai亦賣口乖，稱鍾意香港粉絲嘅熱情。

EXO亦提及代言品牌，Kai指買咗頂帽送畀姪仔，燦烈就表示人生第一頂呢個品牌嘅帽，係由家姐送嘅生日禮物，所以佢依家仍珍藏緊。

燦烈、世勛及Kai隨後喺帽上簽名作店鋪display之用，燦烈又指之後會以唔同面貌如演唱會見大家，希望粉絲多多支持，之後三子與高層、嘉賓合照。

更多韓流，喺晒《娛果》
http://fb.com/appledailyent