下星期就會離港返美國繼續科研工作嘅朱校長噚日出席商台節目,大談過去八年喺香港同科大嘅所見所聞同所思所想。其實香港話發展高新科技都唔係始於今時今日,老董年代已經咁講,當年就係老董搵朱經武入科大。不過,回歸以來特區政府講就天下無敵,做就有心無力,搞搞吓煲呔做咗特首,連工商及科技局都變鬼埋做商務及經濟發展局,唔提「科技」。朱校長噚日話,當時對科研人員都好大打擊。
好嘞,家又搬返「科技」出嚟。朱校長直言,香港一直冇政策支援科研成果商品化,過去唔少本地嘅科研成果,專利權都被其他國家買咗,例如有台灣、日本公司買咗之後去東莞開廠請人生產,令香港最後冇乜得益,亦令本港錯失發展高新科技嘅良機。
朱經武又批評,就算得到政府資助,但當局過份看重眼前成果、短期回報,唔明白科研需要長時間投資,日日問住你搞成點,令科研人員好氣餒。佢仲打咗個好抵死嘅比喻,話如果日日問住佢朱經武點解仲生存喺度,要日日畀飯佢食,佢都唔識答。創新科技署夜晚就回應話,轄下嘅創新及科技基金成立以來,已批出超過40億元進行逾1,500個應用科研項目。
曾經多次當選為最受歡迎大學校長嘅佢又分享經驗,話作為領袖,最重要係有承擔,唔可以下下壓喺人哋頭上下達行政命令,要放下身段多聽民意,如果政策有失誤,就要出嚟承擔責任,唔可以賴話呢啲係某某下屬嘅工作,唔關自己事。