這天頭馬由外籍騎師擸晒，情況似足剛周三泥地夜賽，其中韋達在第二場贏完東廐「變出美麗」，之後一直陪跑冇入過凱旋門，包括在三項國際賽前哨戰全軍盡墨，當中由佢騎開的高廐馬「大運財」換蘇銘倫即贏馬會短途錦標，更加令十三少感到冇癮。
幸好練馬師高伯新冇完全遺忘韋達，第九場三班1400米卜定佢騎「旅遊仁義」，而韋達亦交足功課，策呢匹7.4倍半冷門後上一攻而破，取得個人這天第二Win，十三少同時連勝五次賽事冇斷纜，截至此場他季內有18WIN，穩守騎師榜第二位，好有機會於下月9日重返闊別一年的國際騎師錦標賽。
其實高伯新同韋達合作明顯減少咗，本月以來只得「直震撼」一駒並肩作戰過，呢次攜手勝出「旅遊仁義」有助重建彼此互信，馬兒季內三戰兩冠一殿，表現大熟大勇，今場組合獨贏開A2派19元。高伯新連同「大運財」，這天起孖贏大賽，打造今季代表作，高廐季內暫得六Win全於田草錄得，泥地及谷草均未開糊。
今場二至四名分別係「川河寶駒」、「美麗皇者」及「彩福」，四重彩派五萬八千幾。