李八方online︱副主席鄧飛豪花50萬戰立法會 選舉開支全由教聯會埋單
教聯會立法會選舉
港府以疫情為由強行取消9月立法會選舉,不論泛民同建制參選人都被打亂部署。選舉事務處今日公開部份參選人嘅選舉開支,代表建制派出戰教育界嘅教聯會副主席、將軍澳香島中學校長校長鄧飛,有教聯會資助,喺短短幾個月時間就豪花咗50.4萬元。相比之下,參選區議會(一)嘅工黨麥德正,只係使咗120蚊咋。
選舉事務處近日公開多個參選人嘅選舉開支申報,暫時嚟講用錢最多嘅就係鄧飛。單係拍攝選舉相片已經花費6.9萬元,另外仲花費8,000大元做形象設計。此外,鄧飛亦投放咗大筆開支喺公關宣傳,包括拍攝短片就用咗9萬元,再加8萬元喺Facebook廣告上面。值得一提嘅係,鄧飛嘅選舉代理人報稱係林文輝,即係現任教聯會副秘書長,佢喺去年參選黃大仙區龍上選區落敗,估唔到鄧飛會搵個敗選者做代理人,教路佢點參選。
只係花費咗120蚊嘅麥德正,主要係用嚟影咗2次證件相,每次花費60蚊。而同樣參選區議會(一)嘅新同盟任啟邦就用多啲,花咗772蚊,而佢喺選舉用嘅背心、宣傳物資好多都仲要係舊物重用,認真環保。至於有意參選保險界嘅民主派李福納,就用咗319蚊,全數用喺選舉廣告上面,包括之前同其他民主派參選人一齊開記者會時嘅手舉牌,同埋佈景等等。
-----------------------------
-----------------------------