陳靜（DaDa）噚日拋胸露4寸事業線現身支持ViuTV活動，同場仲有鄧洢玲（阿旦）、王貽興、梁奕倫、余迪偉等節目主持。好耐冇露面嘅DaDa，帶埋3歲外甥女到場，但佢哋個樣有九成似，唔講仲以為係佢個女，DaDa話：「今個新年都湊女，𠵱家係熟手保母，自己都想快啲生，要有段好姻緣先，我屬蛇，聽講今年姻緣、愛情、工作都好。」
上年同台灣男友甩拖後，DaDa一直未有新戀情，佢自爆好心急想拍拖：「都停咗好耐，冇乜機會識新朋友，見嚟見去都係老朋友多，以前緣份都喺外地，𠵱家想搵番香港男仔。」

搬返家飲靚湯

DaDa話想搵個男友可以幫手照顧到屋企人，如果過多兩年仲搵唔到嘅話，就會去相睇。而DaDa近半年搬返屋企同家人住，佢話：「冇個人特別原因，只係純粹可以互相照顧。最初都唔慣，獨立咗咁多年，𠵱家一日三餐好幸福，日日有靚湯飲好溫馨，任何關係都畀唔到呢種感覺我，想儲多啲錢，買間大啲嘅屋同屋企人住。」
另外，阿旦主持嘅《啪啪聲太好聽》會繼續拍多半年，節目探討性愛為主，其中一集講梁奕倫去一樓一撳鐘仔，阿旦自爆以前嘅男友曾經出軌偷食：「幾愛都會斬斷，唔可以忍一世，但女人都要自我檢討，可能性知識唔夠又或自己太差，男友先有機會外求。」
撰文：馮仁昭