七一再多三省九市開放自由行，中原於是趁回歸假期，透過內地網絡，集合一班內地客，由深圳出發，去尖沙嘴宇晴軒售樓處睇樓，當中包括剛開放自由行嘅福建準買家。
來自福建嘅個體戶林小姐話，打算買香港樓投資，貪租金夠高，又有二手市場，而開放自由行後，可以隨時來港，所以今次都趁機了解吓香港市場。
至於溫州方小姐，都係諗住買樓收租，預算用兩三百萬，佢唔覺得香港樓貴，重話比想像中平㖭。
內地買家係香港重要客源，發展商、銀行與代理都諗好晒點樣吸納呢班客仔。宇晴軒發展商長實郭子威話，特別預留十個高層單位畀內地買家，呎價四千二至五千；恒生就會搞講座及提供諮詢服務；中原就照顧佢哋買樓之後嘅需要，放租免佣，重有兩年免費租管服務。

鰂魚涌唐樓值租
早前蘭西提到，鰂魚涌濱海街唐樓﹙見圖右﹚，有投資者睇都唔使睇就買，計劃間套房出租，預料回報十八厘。
蘭西最近又見到，呢條街有成交，八十四號低層，七百呎，月租五千，呎租七個一。租客住新界，但喺太古坊返工，兼時常要加班，所以決定喺附近租單位住，多啲時間休息，慳埋交通費。
上次濱海街八十八號低層，都係七百呎，成交價六十七萬，若果用今次月租計，回報有九厘，可見唐樓回報都幾高。
美聯鍾漢輝話，單係濱海街，六月已經有三宗租務成交。