每年6月5日係「世界環境日」，今年主題係「塑戰速決」，希望全球齊心對抗一次性嘅塑膠污染問題。向來有唔少「膠」作嘅民建聯趁機進行派膠調查，5月下旬喺午市時間派員喺七間本地大型連鎖快餐店買外賣午餐，統計各自含有各式即棄塑膠產品，包括膠袋、膠餐具、膠飯盒等，結果發現大家樂派嘅即棄塑膠餐具最多，其餘依次係大快活、美心、Pacific Coffee同肯德基，最少則係Starbucks。佢哋發現呢七間快餐店喺顧客買外賣時，唔會問顧問有冇需要就主動提供即棄塑膠產品，部份快餐店提供嘅紙製餐具如紙杯同紙碗等都有塑膠成份喎！

民建聯建議相關快餐店可以參考「惜食」模式，如果顧客「走餐具」，可以提供減價優惠，以鼓勵性措施，對顧客、企業同可持續發展達至三贏；該黨立法會議員陳克勤認為跨國企業喺調查中表現較好，或因企業有受外國嘅環保法例規管，亦面對唔少環保團體壓力，並呼籲大家樂同大快活少啲派膠。