頁岩氣股旺到離晒譜，本欄12月6日推介宏華（196），8個交易日飆兩成，昨收2.56元，有讀者問魏力睇幾多，實在難答，因資金湧入，隨時出現非理性股價。宏華市值83億銀，較安東油田（3337）及華油能源（1251）更高，理論上市值越大，炒上難度越高，以百億市值為目標，頂盡炒到3蚊。
自8月底以來，上述3股全部爆升逾倍，目前追入值博率大減，部份聰明錢開始流向較落後的石油設備股，巨濤海洋石油服務（3303）係其中之一。
巨濤市值細，得6.4億銀，易遭大行忽略，但今年業績大翻身，細細隻爆發力可以很驚人。發行股數6.3億股，主席王立山已持有63%，貨源相當歸邊。今年9月發行3400萬份認購權證，換股價0.70元，又多一個炒作誘因。