【新增內容】
杜汶澤同田蕊妮拍拖6年，二人喺2005年拉埋天窗，當時出動華仔色誘眾姊妹(新聞連結： https://bit.ly/2sCeGL0 )，阿澤今日喺facebook貼出田蕊妮嘅單人相，留言：「今天是我們的結婚週年紀念……曾經有人跟我說，婚姻，就是將錯就錯。感謝妳這十三年來的將就，祝妳健康、快樂！」

佢哋結婚13年，二人多年嚟遇過感情危機、阿澤曾患罕見疾病「米勒費雪症候群（Miller Fisher Syndrome）」，必須停工，田蕊妮當時喺寧波拍戲，自責未能喺阿澤身邊陪伴，阿澤仲安慰番佢轉頭，令田蕊妮佩服阿澤遇到逆境，仍能安然面對，讚阿澤係佢「心目中的巨人」。

田蕊妮返港後，每日喺醫院照顧老公，阿澤曾指佢同阿田係「威士忌愛情」越嗒越有味，杜汶澤講過愛的宣言「以前誤會以為成功就會得到女人，但原來得到一個好的女人就等如成功」。患難見真情，感情更勝從前。

阿田除咗係好老婆，仲係好新抱，會陪奶奶去買bra，仲爆咗奶奶係H cup咪神：「我奶奶噚日打比我話要買bodibra!我唯有親身帶佢去買，頭先個售貨員幫佢度身話佢要著H CUP！搞到我依家有d自卑」，之後仲貼埋奶奶攞住bra bra戰利品，露出勝利笑容嘅相，留言：「原來我奶奶係咪神！我極度懷疑佢想係我面前show quality!」不過唔夠半粒鐘，呢兩篇帖文已被「毀屍滅跡」，唔知係咪怕激嬲奶呢！

精選娛聞，喺晒《娛果》
http://fb.com/appledailyent