內地股市喺四川地震發生後靜咗幾日，噚日突然插落，打斷港股炒上勢頭，恒指跌近600點收市，投資者情緒即刻轉淡。
現貨成交828億元，算配合個市跌勢，話唔定會試吓條250日線先至反彈，不過昨日港股成交其實唔算好大，如果今日A股反彈，港股稍為整固後，應該會再上試10日線。𠵱家大市只係升後整固，短期仍會係炒個別，不過氣氛轉淡，注碼要細番啲。

恒生C輪9123：恒指成份股昨日只有兩隻上升，其中一隻係恒生銀行（011），股價報收152元，3支陰燭下跌之後，昨日靠近保歷加通道底回升，反彈看上試160至163元，可以諗吓隻C輪9123，昨收20.6仙，有效槓桿5倍。
正股升上163元，9123可見28.6仙，正股跌穿145元，沽咗隻輪止蝕。