【「奸細」變「界煎」】被張晉笑普通話水皮 蔡少芬嬲豬:有人命不久矣
蔡少芬張晉普通話
45歲蔡少芬和張晉結婚8年,兩人育有一對小公主,一家四口幸福滿瀉。然而,近日網上流傳一條張晉大膽嘲笑老婆普通話水皮嘅短片,結果激到蔡少芬大發雌威,霸氣「恐嚇」張晉,兩公婆隔空大耍花槍,十分爆笑。
事緣張晉在短片中邊打邊爐邊說:「天不怕地不怕,就怕蔡少芬說普通話!」呢條片火速登上微博熱搜第一位,噚晚蔡少芬在微博轉貼熱搜榜,霸氣回覆:「看來有人命不久巳(矣)!」還附有一個嬲嬲豬表情圖案兼連串「¥&$#+%」,可能蔡少芬被老公激到生蝦咁跳,嬲到打錯字,將命不久矣打錯「巳」;而網民都抵死留言:「回去就跟他說普通話,嚇死他。」、「好大的膽子,得罪了娘娘,期待後續。」、「湯包爸有難了!」
其實蔡少芬嘅普通話真係好鬼普通,之前佢在大陸劇《海上嫁女記》一幕rap戲,被電視台公開咗原聲冇配音版,網民留言話聽到起雞皮;跟住蔡少芬以皇后造型亮相《王牌對王牌》節目,將「奸細」講做「界煎」、「辣椒炒雞肉」變咗「藍Q炒雞柚」,同場嘅佘詩曼都忍唔住偷笑。
精選娛聞,喺晒《娛果》
http://fb.com/appledailyent