噚日朝早5隻新股齊掛牌，港交所（388）大堂當然人頭湧湧，當中有位稀客，就係證監會前主席方正嘞！佢以縱橫遊（8069）主席親友身份撐場，原來方Sir同縱橫遊袁氏家族係世交，所以就畀面出席上市儀式。
方Sir目前係港鐵（066）、渣打銀行香港獨董，自言係「半退休人士」，得閒咪幫吓老友咁話。

縱橫遊掛牌　畀面撐場

講到幫老友，政壇有兩位仁兄仁姐正需要各方好友幫手，講緊嘅，咪就係鬍鬚曾同林鄭囉，兩位等緊阿爺批准佢哋辭職，之後開展特首選舉工程。方Sir堅稱，佢自己都冇消息，「都係剝花生等睇戲！」。咁𠵱家已經揭盅，大把人會落力賣武，希望泊個好碼頭，方Sir不愁無花生食喇。
方Sir 2003年退休前係羅兵咸永道高級合夥人，之後做過多年證監會主席，為人十分低調，咪以為特首選舉一定與佢無關，事關佢太太方黃吉雯喺香港回歸前後乃政圈大紅人，被暱稱「小吉」嘅方太，回歸前已經係港事顧問，回歸後做咗5年行政會議成員，係前特首董建華嘅智囊。
世事多變，政壇變得更勁，話唔埋有人真係要搵方正幫手㗎。

李華華
mailto:[email protected]