當年今日
關於我們

用車報告:
標緻307車主至愛 造型突出售價吸引

蘋果日報 2002/03/10 00:00


標緻307車系自推出以來一直深受用家歡迎,皆因佢除咗擁有一個出眾嘅賣相、實用多變嘅車廂布局及設備配搭外,一台2.0公升直4引擎所發出嘅138匹馬力,更係佢嘅賣點之一;而今日《用車報告》嘅主角姜先生,就係以標緻307作座駕。大家係咪好想知道佢對307有何評價呢?係就唔好錯過今日呢份《用車報告》喇。

記者:鄭達基 攝影:陳智良
標緻307小檔案
自標緻代理引入206車系大收旺場後,於去年底又引入307車系;此車除取代原有306外,其極富RV個性嘅造型及設備配搭,更予人有一分新觀感㖭!307喺剛推出時嘅售價為$155,000起,至現時仍以呢個價錢發售,難怪新車一直備受用家追捧啦。
姜先生選擇標緻307兩大原因

原因1
安全售價為重點
好多用家(包括小記在內)喺選擇自己嘅心水座駕前,都會親身到各大車行參觀試車;而姜先生亦唔例外,佢喺買車前亦曾到各大汽車代理嘅陳列室參觀,但點解姜先生到最後會決定選擇標緻307作座駕呢?據姜先生表示,佢揀車嘅先決條件除咗要賣相吸引、車廂實用多變外,對乘客嘅保護性及售價亦係重點之一;而去年底正式推出嘅307正好符合上述要求,加上佢備有掀背式嘅尾門設計,上落行李時十分方便。故此姜先生便於今年1月以接近17萬嘅價錢,購入大家眼前呢部307作座駕。


原因2
車廂闊落操控性強
姜先生又認為307嘅車廂布局,可謂既多變又實用;除空間寬敞舒適外,車內座椅布局更係靈活多變,遇有需要時可將後排座椅收摺,以增加尾廂載物容量。另一方面,姜先生又覺得307嘅設備配搭齊全,使用時重好方便㖭。然而,新車出色嘅懸掛系統,加上四輪高性能輪胎配搭,從而令307喺日常行車或入彎時,都可以有平穩順暢嘅表現,兼可增強乘坐舒適性;姜先生又認為一台2.0公升直4引擎,喺一台4前速Tiptronic半自動波箱嘅輔助下,亦能令307有不錯嘅性能表現,無論起步或加速都予人有滿意之感㗎。
缺點
A柱較粗造成盲點
講到缺點方面,姜先生就覺得307嘅隔音表現略差,當行走一啲狀況較差嘅路面時,情況會尤為明顯;另外車子嘅A柱較粗,雖然旁邊設有一小窗,但轉向時仍會有盲點出現。相信廠方若能將上述問題改善過來,定能為307增添不少分數。
售後服務
到最後,姜先生覺得代理方面所提供嘅售後服務,表現絕對能令人滿意;除維修服務中心嘅職員態度彬彬有禮、樂意而詳盡解答姜先生關於座駕嘅問題外,維修質素、價格、交車時間及整潔程度,都係令姜先生感到滿意嘅原因。
標緻307規格 引擎: 1997cc直4DOHC 馬力: 138ps/6000rpm 扭力: 19.8kgm/4100rpm 傳動: 4前速半自動波,前輪驅動 輪胎: 205/55R16 懸掛: (前)麥花臣支柱 (後)橫向連桿 制動: (前)透氣碟 (後)碟式(ABS) 尺碼: 4202×1730×1510mm 軸距: 2608mm 車重: 約1240kg 2001年售價: $155,000起 現時售價: $155,000起